小記周四完成香港划艇隊嘅訪問之後，喺等緊傳媒巴士期間，遇到一位嚟自美國嘅靚女奧運義工Irene，喺場外做交通指揮嘅工作。
義工體驗畢生難忘
35歲嘅Irene原來喺香港出世，不過八個月大嘅時候就已經移居美國，其後一直住喺紐約，仲喺當地邂逅咗去美國旅遊嘅巴西籍男友，追隨佢南下巴西，𠵱家輾轉咁成為里奧義工。
或者好多人都對負面新聞多多嘅巴西冇乜好感，但Irene就話：「巴西人好友善，佢哋會同所有人傾偈，而且同所有人都可以做朋友。」
已經住喺里約一年半嘅Irene仲話，自己其實唔鍾意運動，但對奧運就特別有情意結；佢仲話可以做到義工，肯定係自己畢生難忘嘅事情：「呢度未必可以令你學到特別嘅技能，但我喺呢度體驗到嘅事，比任何事更加值得。」
記者：徐嘉華、盧曉君