繼公民黨楊岳橋同工黨張超雄決定喺新界東互撐參選後，以獨立身份參選九龍西、主張「推倒高牆，自決自強」嘅小麗老師劉小麗近日亦接受參選超區、同樣曾任職教師嘅街工梁耀忠邀請，決定喺今次立法會選舉互相支持。
關心弱勢理念相近
阿忠話，約兩星期前主動搵小麗傾合作，主要係因為小麗經常關心弱勢社群同社會小眾，同佢一樣唔會只跟大潮流做事，同時小麗好關心長工時對家庭影響、墟市小販等問題，同阿忠參選主題「基層自主，共抗霸權」好接近。
小麗就話，喺香港前途問題上佢係自決派，比主流泛民進取，但覺得主流泛民中阿忠好特別，除咗會講《基本法》問題，喺居民組織方面都落咗好多功夫，唔同一般泛民只幫街坊做個案，覺得阿忠嘅社區組織同公民教育工作同自己理念好相似，所以答應合作。
阿忠同小麗頭炮合作就係噚日喺石硤尾一齊擺街站同派傳單，增加同街坊接觸，據知佢哋嚟緊仲會推出有齊兩人嘜頭嘅宣傳單張，實行一直互撐到選舉結束。該區其他參選名單，請參閱本報立會選戰網站 http://hk.apple.nextmedia.com/legco2016/region 。