特首梁振英接受《都市日報》專訪，前日第一輯就講自己如果要選特首，就唔怕同人競爭，噚日登埋第二輯，今次CY講自己同家庭，唔係佢親口講都唔知，原來佢係有朋友㗎！佢仲話自己後生都有上過街遊行示威，不過地點就唔係香港，而係英國。
抗議學校加學費
CY明顯想利用今次訪問反駁一啲對佢連任不利嘅說法，好似佢上任至今，唔好話同泛民冇偈傾，連商界、建制中人都話佢冇朋友，咁搞法點樣爭取連任！CY喺訪問入面，就否認自己冇朋友，話如果佢冇朋友，就唔可能喺社會做咁多公職，話呢啲嘢係要一班人大家一齊做喎！呢班朋友唔通就係佢班梁粉？
CY每逢喺個人facebook專頁發帖，即刻會有以千甚至以萬計市民畀嬲嬲，佢就好似冇乜所謂，話觀點事實講清楚，聽完之後仍然嬲，總好過無緣無故咁嬲，對市民嘅嬲嬲冇有怕，因為佢根本冇打算博like，好似有少少暗寸緊喺facebook有好多like嘅財爺鬍鬚曾喎！
CY仲明顯想畀人知，唔只得鬍鬚曾了解年輕人，佢都好了解㗎！訪問提及佢上任冇幾耐，就爆發咗學生反國教示威，對於今時今日部份年輕人有反政府嘅心態，CY忽然變得好似好理解咁，話唔能夠將年輕人單一化，就算有年輕人反對政府亦好正常喎。佢又大爆自己當年都喺英國為反對學校由265鎊學費加到360鎊試過上街遊行，不過八方聽完佢咁講，就覺得呢個CY點解唔同咗嘅？明明有好多參加過佔領嘅後生仔𠵱家仲俾政府告緊！
最後，CY又再為佢太太同個女喺機場被指特事特辦解畫，佢繼續否認有用特權同施壓，又話當日堅持澄清，係因為以後再澄清就冇人理，又話從政者嘅生活俾人唔單止用放大鏡，更加係用顯微鏡去檢查，所以有乜事就要出嚟講清楚喎。
李八方
mailto:[email protected]