梁詠琪（GiGi)出道時曾是少男心目中的女神，今天已變為人妻兼人母，今年是她入娛樂圈20周年，過去曾經歷高低起伏，人生的下半段她希望將焦點放在家庭上，希望工作隨心而行，不再需要討好人，做最真實的自己。
統籌：林妙萍
撰文：顏英儀
攝影：周樂恒
攝錄：林德雄
化妝：Circle Cheung of ndnco.co
髮型：Nick Lam of Pi4.com.hk
GiGi去年升呢做人母，有女萬事足，訪問時話題總是離不開愛女Sofia，「囡囡出世後責任感重咗，𠵱家做任何事都會以囡囡嘅福利行先，令我最開心嘅係家庭生活嘅融洽，同囡囡游水已經好開心，知足令我幸福，亦都係呢份幸福令我知足，物質對我嚟講已經冇乜意義。」GiGi現正與丈夫和囡囡身處西班牙，一家三口到巴塞隆拿探祖父母，享受家庭樂。
巡唱慶祝20年
回港後GiGi將要籌備「梁詠琪2016好時辰演唱會」，第一站將於深圳揭幕，香港站因紅館未排到期，要等到明年才舉行，「演唱會主要同歌迷分享入行20年，重溫好多舊歌，會先自彈自唱，仲要減肥，唔會減到好似以前未生咁瘦，有少少肉地會好睇啲。」生女後GiGi甚少離開囡囡，已跟家人傾好湊女安排，「同屋企人傾好晒湊女安排，一個城市最多去3、4日，唔會離開香港太耐。」
回憶教人回味
GiGi入行20年，最難忘入行時工作排得密麻麻非人生活，「諗番起以前嘅工作量都幾誇張，以前趕完通告嘅日子，拍完通宵戲第二日要飛去台灣錄音，之後又再飛去拍戲，喺飛機上先可以瞓覺，呢啲非人生活只能夠回憶，將來唔會畀自己忙成咁。」
下月開演唱會又plug新歌，新歌會以卡式帶面世，復古當時興，「《B面第一首》係代表新階段嘅開始，之前搵Wyman填詞，我同佢講𠵱家人生過咗一半，好多事情嘅睇法都唔同，好想寫一首歌講吓𠵱家嘅心情，以前行過嘅路係值得嘅，不過未來係咪可以多啲跟自己嘅心去做嘢，唔需要再討好其他人，或者唔使睇住個市場做音樂，每一步都跟住自己個心去行。」
培養女兒德行
贏在起跑線已out，贏在射精前讓社會議論紛紛，身為港媽的GiGi又是如何安排囡囡的將來？「Sofia已開始上playgroup，屋企全部大人，想佢接觸其他小朋友，學識分享，其實我冇諗得太遠，將來可能返西班牙讀書，呢幾年想佢學呢好中文，學術上唔使太心急，反而我覺得囡囡嘅德行更緊要。」
GiGi在陀Sofia時曾說過想生三個，囡囡下月便歲半，現因巡唱要將追B大計押後，「之前都有諗過等囡囡歲幾就會追第二個，不過下半年要做巡唱，坊間話隔兩年半到三年先生第二個都OK，所以要等下年先考慮追B。」
囡囡趣事多籮籮
做母親後GiGi話題離不開囡囡，她更用手機拍下女兒的開心時刻，親手剪輯成短片，「囡囡嘅趣事日日都有，有一日我畀紙巾佢抹嘴，點知佢用嚟抹地，我同佢講唔係用嚟抹地，係用嚟抹嘴嘅，之後佢又用嚟抹嘴，真係畀佢激死！有時佢會發明手語，要估好耐先知佢想講乜，有次佢企喺門前，拉自己嘅手指，原來佢想我開門畀佢，日日同佢玩做動作估戲名，先估到佢想講乜嘢。」
更多精采時尚內容，盡在 http://add.appledaily.com 。