玩Pokémon GO玩到出晒名，號稱全美國最強嘅精靈訓練員Nick Johnson，前晚抵達香港之後，講明要喺一日之內，收服亞洲限定嘅精靈火蔥鴨。叫得做最強，阿Nick就梗係冇失威，佢喺抵港第7個鐘、即係噚日凌晨1點半，就喺西灣河愛秩序灣公園成功生擒隻鴨。𠵱家已經轉飛澳洲，準備收集精靈圖鑑入面最後一塊拼圖，澳洲限定精靈袋獸。
阿Nick捉鴨過程都算大陣仗，唔單止要用精靈地圖幫手追蹤，贊助商仲派車載阿Nick四圍去。雖則阿Nick用盡秘技，但捉鴨過程都幾驚險。據阿Nick團隊講番，地圖情報話火蔥鴨一時喺荔枝角、一時就過咗太古城，最後見到火蔥鴨就係西灣河愛秩序灣公園。佢哋飛車到場得番3分鐘，經驗少啲都分分鐘走鴨，不過做得最強，拋咗一個精靈球就一擊即中搞掂收工。