以前就話政治咁悶，睇嚟把鬼？今時今日仲咁諗？超錯！睇睇今屆立法會選舉，五區直選史無前例咁多人報名，而且唔少候選人嘅言論同賣相都相當出眾，肯定係大熱選手以外嘅焦點，八方睇好其中3位「女」選手突圍而出，為選戰帶嚟非一般娛樂性。識睇，梗係睇呢啲！（點解「女」字要括住，睇埋落去你就知！）
如果要論資排輩，梗係要數咗九龍西嘅林依麗先啦！今次林EE再接再厲參選，繼續提出大婆至like嘅政綱推動包二奶刑事化，仲話要捍衞廣東話。大家唔好忘記，佢成日狙擊禮義廉㗎喎，而且佢表明唔會P圖呃人，有花生友話擔定凳仔，等睇林EE喺選舉論壇點向俾長毛質疑P圖過度嘅民建聯蔣麗芸出擊。
聞菊人氣升
有冇印象去年底嘅區議會選舉，有班三點式艷女喺旺角街頭為候選人助選？冇錯嘞，就係當時油尖旺區參選人，即係着過女裝、有過羊羊同楊芷晴等網名、又曾被稱昭明公主、原名鍾銘麟嘅中出羊子呈獻！佢出色嘅宣傳，輸選舉贏賞識，今屆新界西出選，網民最期待呢批辣妹再次陪佢遊街，當然前提係佢參選資格唔會被取消，皆因政綱寫明「展開國民外交，大範圍搞港獨」。
最後一個重量級人物（係真係好有重量㗎！），點可以數漏正義聯盟李偲嫣？因為出版聞菊P相圖輯《情書》而人氣急升嘅李偲嫣，決定喺新界東作法，之前地區宣傳已經惹嚟廣泛注意，嗰股佢一舉手一投足獨有嘅氣勢，認真巴閉！咁佢成為候選人嘞喎，網民最想睇到乜？相信都係點樣喺論壇語出驚人，但唔少人料更加期待，佢再以制服造型迷倒眾生……wow，諗起都暈一暈咯！
李八方
mailto:[email protected]