喺上季帶領侯城重返英超嘅領隊布魯士，周五突然落實離開老虎仔，啲人就估佢可能食回頭草去教「黑貓」新特蘭，因為艾拿迪斯已接任英格蘭新任主帥。
55歲嘅英格蘭籍領隊布魯士同侯城嘅管理層唔係好妥，覺得佢哋搞波冇乜大志，加上侯城班主想賣盤，所以有傳布魯士想走好耐，而佢帶領侯城喺上季英冠升班附加賽決賽贏咗錫周三後，就直情開到口話唔知喺2016/17年球季仲會唔會係侯城嘅領隊，終於佢喺周五就確認離隊。啲人估布魯士會去英超嘅新特蘭教波，接替極有可能轉去教英格蘭國家隊嘅艾拿迪斯。不過，布魯士當年喺黑貓鬧得好唔愉快，俾黑貓請食無情雞，仲會唔會返去呢？不過英足總已公佈艾拿迪斯教三獅兵團，布魯士仲有邊度好去？布魯士早前都有獲邀去英足總面試，見完之後佢話希望成功，仲話教英格蘭國家隊係佢最夢寐以求嘅工作。