英鎊匯價下跌、日圓回落、線上線下大減價，叫一眾啡唇精如何忍手？然而消費咁多嘢，衣櫃飽和之餘，地球亦逐漸承受不了。我明，作為時尚寫手叫人唔買衫同少啲消費的確冇乜說服力，但正在哥本哈根隨時裝設計師Henrik Vibskov工作兼深造的時裝設計師黃琪（Kay），正實行「禁慾計劃」，身體力行誓要一年唔買衫，雖然佢都認有難度，但或者擇善消費、重新思考衣着配搭各樣可能性，亦係愛時尚嘅另一體現？
「時裝這行我做了十年，（上年關掉自家品牌Daydream Nation工作室時）發現原來留下了很多貨、物資和樣辦，同時很大對比地，我拿了很少東西去北歐，加上fast fashion對這個世界或時裝行業，對農夫 、工廠工人也不是太好，所以我要試試一年不買新衫。」
綠色和平曾經有研究指出，其實生產一條牛仔褲平均要使用7,000公升水；生產一件T恤就要2,700公升水，咁用水法足夠常人飲900日，的確對環境唔多好。
既然唔買新衫，咁就要喺舊物中不停搵新方法混搭，Kay最近在博客中經常分享襯衫方法，就算有重複出現的單品，各位觀眾亦好少睇得出。「喺香港，無論你去到邊都是時裝或店舖，不停看太多東西 ，變成沒有空間創新。在香港要實踐一年唔買衫的難度比較高；大家要整理一下自己的衣櫃，當我整理衣櫃時，發現有很多單品也是沒穿過的。」咦，講講吓，我個衣櫃都好似有幾件衫未剪牌。
「有一個名詞我覺得很有趣，稱為Fashion Mileage，叫我哋買衫時要諗諗，一件衫可以着幾多次。」Kay說的，正是環保時尚分子Livia Firth的理念，講緊買一件衫時你會着超過30次先好再買。咁講法，喺着勻衣櫃嘅衫之前，好似係時候收收手喇。
記者：黃樂雯