【本報訊】化妝樓有迹可尋，資深驗樓師詹濟南點出化妝樓特徵，提醒準買家尤其睇「水」，一旦暗喉出問題，全屋重鋪喉管動輒數萬元。另外律師建議準買家於合約列附加條款保障雙方。
炒家陳清白表示化妝樓是炒家以低成本買入，執完賣貴點，「例如260萬元買入，唔執，賣300萬元；但執完賣得快，仲可能賣到330萬元，明明用10萬元裝修，跟住同人講話用咗30萬元，結果賺多20萬元」。他指：「化妝樓通常是舊樓，如果層樓交吉、無人住，肯定係化妝樓。如果加上之前租咗出去，收番來，九成都是化妝樓。」
資深驗樓師詹濟南憶述過往檢驗化妝樓，綜合三個字，分別為水、電及遮。水方面，牆身滲水最喜髹深色，明明來去水或暗喉有問題，卻稱無交水費，話已閂水掣。電方面，留意電器是否「裝假狗」，隨時純粹得個殼，電線也可能沒駁。曾有業主用報紙包住單位內分體式冷氣，打開報紙，雖見機身，卻搬走外面分體機。所謂「遮」是原業主用大型傢俬遮醜，最常遮蓋浴室與客廳牆身。
律師梁永鏗建議，準買家在簽訂買賣合約時，可列附加條款，例如「原業主表明單位沒有漏水」等。作此聲明，若收樓後發現相關問題，可向原業主追討賠償。