陳妍希同內地小生陳曉今日成婚，全場最靚嘅當然係妍希BB，不過佢嘅伴娘團亦威力驚人，仲俾唔少台灣傳媒稱為「史上最美伴娘團」！伴娘伴郎團同新人合照時，見到陳喬恩同阿嬌（鍾欣潼）各坐新人兩邊，聯同中國演員胡冰卿等四位姊妹，一齊身穿露肩古典刺繡粉色little dress現身，勁襯新人所揀嘅郭培‧玫瑰坊高訂系列龍鳳刺繡裙褂，classy又唔會搶晒新娘子風頭。其實現時唔少婚禮流行主題式禮服設計，無論要襯中式傳統味或輕鬆民族風亦得，唔再一味係長紗裙，準新人可以諗諗佢喎！
記者：黃樂雯