大新銀行（2356）為慶祝今年70周年，下月換新制服，搵來本地著名時裝設計師邱雪祺（Cecilia Yau）幫手。
Cecilia曾經喺法國修讀高級訂做時裝（Haute Couture），不時替大台一班姐仔設計台慶戰衣，當年郭羨妮一套中門大開嘅戰衣，相信大家都好深印象。佢亦有為名人設計婚紗，「玩具大王」蔡志明新抱汪圓圓、歌手李樂詩嘅婚紗都係出自佢手筆。
以為佢只做華麗靚衫，估唔到平實嘅銀行制服，佢都願意出手。據佢介紹，今次用番大新嘅企業顏色，以紅、灰做主調，再喺detail位落功夫，將大新logo上面嘅算子特色（算盤珠子）變成衫袋。Cecilia認為，算子係中國文化好重要嘅因素。
不過對於股東而言，最關心都係銀行會否為慶70周年派特別股息之類，可惜，管理層話未諗住，有消息就會公佈。