威爾斯創紀錄，喺上周五場歐國盃八強以3:1反勝比利時，同葡萄牙會師四強，焦點當然係加里夫巴利同基斯坦奴朗拿度（C朗）嘅皇家馬德里雙翼對決啦！威爾斯贏波之餘贏盡掌聲，最大輸家當然係比利時啦，俾人吹到粒粒皆星，但喺大賽又證明唔到自己；至於英格蘭明明出咗局幾日，都俾英媒拎出嚟鞭屍。
威爾斯呢場證明咗，球員逐個秤唔夠人勁唔緊要，最緊要團結同有紀律。雖然佢哋先俾比利時嘅尼恩高蘭入波，但艾殊利威廉斯藉角球攻勢半場追平。換邊後，威爾斯打反擊，今夏被雷丁放棄嘅前鋒笠臣簡奴技驚四座，喺比利時嘅禁區施展「告魯夫轉身」射入，之後實大把世界！趁比利時空群而出，威爾斯末段仲靠禾基斯入多粒，鎖定贏3:1，歷史性殺入四強！
巴利C朗爭入決賽
威爾斯可唔可以入埋決賽？就要問吓葡萄牙嘞！見到呢場四強，相信皇馬主席佩雷斯就最高興，佢麾下嘅「兩億齊飛」喺國家隊齊齊爭氣！賽後被問到要同C朗打對台，巴利就叫大家唔好睇成兩個人嘅對決，「呢場係威爾斯對葡萄牙，係11個對11個嘅比賽。我哋全部都好有信心，期待四強嘅來臨。」但巴利就冇咗個好拍檔，艾朗藍斯今場犯手球領黃，下場同中堅賓戴維斯一齊停賽，所以佢非常失望。藍斯今場送出兩次助攻，冇咗佢的話，威爾斯攻力肯定差咗。
蔗渣價錢勁過英軍
威爾斯打入四強，賽後英國傳媒齊齊讚好，同時亦冇忘記英格蘭。英格蘭向來係英倫三島足球嘅大佬，但今次大佬失威之餘，細佬仲要咁威水，真係瘀爆！唔計1968年得四隊踢嗰次，英格蘭踢咗半個世紀歐國盃決賽周，得一次入到四強，但威爾斯第一次參賽就平咗英軍紀錄，你話尷唔尷尬！英國《每日郵報》仲列出威、英正選嘅人工做對比，威爾斯正選周薪為56萬鎊左右，但英格蘭就過百萬鎊；朗尼、哈利卡尼，你哋慚唔慚愧！