正當英格蘭國家隊俾英媒同網民笑緊高薪低能嗰陣，佢哋真係理得你，總之球會人工已袋，大賽就交行貨。隊長朗尼同中場迪利阿里已經去咗西班牙度假，至於右閘基爾獲加就俾人爆大鑊，佢同個艷模講寧願去伊維薩島度假都唔想踢歐國盃。
一位叫卡娜嘅《花花公子》女郎話，佢兩個喺歐國盃前傾短訊，嗰陣英格蘭已經集訓緊，佢問獲加：「你喺伊維薩島？」獲加就答佢：「我都想！」英媒雖然未影到獲加家陣喺邊，但佢嘅國家隊兼球會隊友阿里就已經喺伊維薩島狂歡緊。朗尼亦享受緊陽光與海灘，喺遊艇度玩，但俾人影到佢喺甲板失平衡跌低（下圖），成個滾地葫蘆咁，可能飲大咗兩杯啩。