中國電力（2380）由上年6月高位6.8元，累插60%，幾乎返去2004年上市價2.5元，就算冇咗上年嚟自出售證券嘅肥仔溢利，中國電力今年都係得5倍預測市盈率（PE），加埋8厘高息，仲唔抵搞？
中國電力大股東巨無霸「國家電投」，有母系實力優勢。而喺嗌救命環境底下，中國電力上年實際溢利增長20%，到33.2億元人仔。今年頭一季，集團總發電量同售電量，亦同比增加超過16%，而喺水電售電量，同比係大增近40%，到近525萬兆瓦時。
又發改委數據，今年頭五個月，水電發電量同比增加16.7%。內地總體水電，喺3月打後，keep住靚仔，中國電力憑住呢瓣，支持到今年有好表現。中國電力上年連出售證券溢利8.3億元人仔，往績4倍PE。
場內專業評估，集團今年就算冇咗呢項非經營溢利，每股盈利0.53港元，而集團上周三股價2.76元，今年得5.3倍預測PE，比起上市以嚟平均11倍PE，平咗一半！同樣專業評估集團今年息率係高達8.2厘，又係吸引到爆！
又就算以瑞銀所俾嘅保守目標價3.4元計，現時買中國電力都講緊要升近兩成，集團目標價嘅預測PE都係近6倍。