正當歐國盃仲踢得如火如荼之際，歐洲球會已經陸續開操，就好似英超冠軍李斯特城咁，一班冇份踢大賽嘅球員喺上周五返到訓練基地報到，做吓身體檢查同輕鬆跑吓步。中堅賀夫、右閘丹尼森遜同前鋒荷西烏路亞都喺度，而路爾斯靴南迪斯同薛拿兩位新援亦有接受檢查，佢哋到禮拜一就會認真操練，備戰新球季。至於占美華迪、安迪京治、尼高路簡迪、韋斯摩根同基斯甸富治斯因為今夏參加歐國盃或美洲盃，呢班國腳就獲准遲啲歸隊。