得到巨額電視轉播合約嘅帶動，NBA新球季嘅薪酬上限急升，NBA列強既要留人又要搶人，出天價合約是常識吧！聯盟歷來最大合約就喺上周五誕生，28歲控衞干尼（Mike Conley）接受灰熊開出嘅五年1.53億美元（約12億港元）合約，年薪超過3,000萬美元，真係誇張；同日灰熊亦以貴價羅致小馬嘅「高富帥」柏臣斯（Chandler Parsons），連埋中鋒馬克加素（Marc Gasol），組成天價三巨頭。
灰熊燒錢挖埋柏臣斯
今季平均拎到15.3分同6.1次助攻嘅干尼，今夏成為自由身球員，馬刺同小馬等球隊都想爭佢；灰熊為表誠意，之前仲搵埋紅歌星Justin Timberlake拍片留人。不過講嚟講去，都係金錢誘惑實際啲，一張1.53億美元合約，令干尼成為NBA史上首位合約總值過億，兼年薪超過3,000萬美元嘅球員，據報干尼已經答應續約。
以過億合約留住一個未打過明星賽嘅球員，值唔值就好難講，但灰熊呢次就真係豁出去喇，同日仲以四年9,480萬美元合約，挖小馬前鋒柏臣斯過檔；柏臣斯喺自己twitter留言，多謝小馬球迷、隊友同埋班主古賓（Mark Cuban）兩年嚟嘅支持。
拜恩（Kobe Bryant）喺2004年同湖人續咗一張七年1.36億美元合約，當時大家已經嘩嘩聲，點知呢個紀錄保持咗12年，上周五俾人打破之餘，仲一下子跌到去第四位㖭；拓荒者以五年1.4億美元，同後衞尼拉特（Damian Lillard）續咗約，而歷史性殺入東岸決賽嘅速龍，亦以五年1.39億美元合約留住射手迪洛桑（DeMar DeRozan）。
杜蘭特同快艇勁好傾
作為今夏最紅嘅自由人，杜蘭特（Kevin Durant）都仲未出手，七月中將會嚟香港嘅KD，𠵱家就逐一會見有意羅致佢嘅球隊；噚日就同快艇傾咗成四粒鐘，大家都好似幾開心㖭，反而同勇士見面就冇咩特別喎，唔知佢會唔會打破干尼份大合約嘅紀錄呢？