「搏盡無悔！」噚日喺體院舉行嘅D1長池分齡泳賽兼最後一個奧運達標賽，專程從美國密芝根返港嘅23歲女飛魚劉彥恩，喺200米背游出2分09秒33，刷新港績兼成為第四位港將達里奧A標（A標係2分10秒60）。港隊已有嘅三個A標，何詩蓓、鄭莉梅同江忞懿都係喺外國造出，劉彥恩呢個係首個喺香港達成嘅A標。佢話等咗足足八年幾，對於寨卡病毒就話：「我無計劃喺兩年內生BB，所以唔擔心。」
歐鎧淳里奧要破港績
里奧游泳截標日係今日，200米背同場仲有歐鎧淳爭達標。頭7、80米都係歐鎧淳領先，但劉彥恩越游越有，最後打破歐鎧淳2分10秒88嘅港績奪冠。歐鎧淳以2分11秒95得亞軍，失落A標。
嚿年喺密芝根大學畢業後，劉彥恩就留喺大學做全職泳手，同師妹何詩蓓日日訓練，佢話：「京奧我爭0.23秒去唔到，上屆倫奧達B標，但時間唔靚又落空。」劉彥恩喺里奧嘅目標係入16強。至於歐鎧淳就期望喺里奧4x100米混合泳接力可以破港績。另外，理大生郭家輝喺男子200米蛙游出2分17秒87新港績奪冠。