正所謂有麝自然香，呢句說話套用喺傑志成名嘅西班牙教練甘巴爾最適合不過。點解？澳洲足總噚日公佈，原本去咗美職聯擔任紐約城預備組教練嘅甘巴爾，八月會出任澳洲U23教練，正式升格到國家級教練層面，當年一手引入佢嘅前老闆伍健亦都喺fb恭喜甘仔。
喺西班牙巴塞足球學校做總監嘅甘巴爾，09年獲前巴塞會長拉樸達介紹畀傑志，除咗帶領傑志攞兩屆港甲冠軍，仲幫傑志建立咗一套打法。佢之後俾澳職球隊阿德萊德聯挖角，2013年轉戰澳職，教咗兩個球季後，上年就加盟美職聯紐約城，擔任青年軍教練。
曾領傑志兩奪港甲冠軍
剛滿40歲嘅甘巴爾離開咗澳洲一年，但仍然俾澳洲足總睇中，搵佢接手澳洲奧運代表隊，雙方仲簽約四年。不過，嚟緊八月里約奧運應該見唔到甘巴爾領軍，原因係澳洲奧運隊前教練正正因為攞唔到今屆奧運入場券，所以俾人炒魷。
甘巴爾接手澳洲U23後講明未來有兩大目標：「除咗爭取出線2020年東京奧運外，我哋亦都會準備好一批可以隨時『升呢』做大國腳嘅球員。」據知，甘巴爾一直有同傑志高層保持聯繫，今次佢返澳洲履新前，可能會返香港同傑志球員聚舊喎。