「糖王」郭鶴年已屆松柏之齡，但子女點樣分家似乎仲未敲定。由長子郭孔丞任主席嘅香格里拉（亞洲）（069）噚日宣佈，二房長女郭惠光由非執董，轉做執董，兼任副主席，接替年屆72歲嘅老臣子雷孟成。
郭惠光原本坐鎮南華早報（583，現稱南潮控股），將傳媒業務賣畀阿里巴巴之後，郭惠光已於今個月初辭任非執董。
香格里拉（亞洲）一向由長房負責，不過三年前長房二仔郭孔演懷疑因為業績唔好，壓力爆煲，辭去CEO同主席職位，公司由哥哥郭孔丞接手。郭孔丞𠵱家就搵埋二房阿妹幫手。
據講，二房細仔郭孔華最得爸爸歡心，佢係嘉里建設（683）非執董，而二房嘅孻女郭燕光，雖然自己創業搞二手名衣飾網，但寫字樓就設喺嘉里總部。