好多政商界名人身兼多職，正職之外，兼任唔少公職，搞到自己有好多會議要去開，有時根本分身乏術。證監會噚日公佈最新年報，就見到兩位非執董馬雪征與鄭國漢，應該就係呢類大忙人，佢哋缺席咗唔少證監會嘅會議。
先講聯想（992）前掌櫃、現任博裕資本董事長馬雪征，證監會舊年有16次董事局會議，佢缺席5次，另一個投資委員會有4次會議，佢只出席兩次。
嶺南大學校長鄭國漢似乎更忙，16次董事局會議，佢缺席6次，只得一次嘅薪酬委員會會議，佢都無法出席。鬼咩，鄭校長戴好多頂帽，除證監，又係投資者教育中心主席、行會成員、競爭事務委員會與經濟發展委員會委員，開會撞晒期都未定。
鄭校長嘅任期至今年底，亦做滿6年，根據政府委任公職嘅不成文規定，多數只做6年，鄭校長到時應該可以睇少瓣。