【本報訊】近期銀行大規模裁員，為金融業敲起喪鐘。張一鳴指，早預見金融業轉變，港股已不再睇基本因素，純跟外圍、大陸走，但「大陸唔睇基本因素，炒內幕消息」，香港人「唔知大陸做緊咩，咁點炒？冇得同佢玩！」
大陸唔睇基本因素
張一鳴形容，大陸是塘水滾塘魚兼政策市，當經濟數據差時，市場預期政府會出手，作為負責任且睇基本因素的基金經理明知不應該跟，但「你唔跟住隊落去？你就會underperform（跑輸大市）」，但跟大圍走卻「衰過澳門，你都唔知自己賭緊咩，但你逼住咁做」，故最終止蝕轉行。
王震宇則認為，現時做分析員比五、六年前難得多，因增加很多compliance（合規主任），行業對於政策影響力視作「三幾年後的危機，對於股價的相關性次一級」，所以無人聽，研究政治。
金融業波動令部份高薪卻經驗豐富的分析員離開，王震宇指「環境係咁，（新分析員）跟風無主見」，以往同一間行亦可和而不同，但現時是跟隨最上層的假設，其錯判將會影響全間投行。
他亦不諱言，以往做事「不是為了賺多幾個客」，但現時許多分析員僅配合市場推出極短視的產品。雖然Target Price（目標價）是睇一年，但現時卻出現「甚至（睇）12日」的情況。
張一鳴亦提到，現時做到研究部主管可能未經歷過一個完整周期，「根本未夠秤」。