中大崇基校友（社會75）冼杞然在80年代係新浪潮電影嘅中堅份子，幫潘迪生嘅「德寶電影」拍過唔少叫好叫座電影，後來退出影壇一段時間，點知誤打誤撞，北京有人以為佢嘅老闆係潘迪生，佢都會識得唔少百貨零售業務，於是請咗佢上北京，幫手開辦SOGO。冼杞然既來之，則安之，憑香港電影人之拼勁與創意，全新審視百貨公司之營業方法，竟然俾佢為SOGO北京打開局面，十分成功，成為內地百貨公司群起學習之對象。
上星期冼杞然在港澳推出新電影「終極勝利」The Last Race，係繼「聶隱娘」之後，另一力作。請老友記查小欣主催飯局，小欣姐問左丁山去唔去，一聽見話係冼杞然，梗係去啦，上次大家見面已係十年八年前，好耐冇見咯。
飯局上，冼杞然話在北京期間，被邀幫忙2008北京奧運之宣傳推廣，拍奧運紀錄片，工作過程中，發現電影「烈火戰車」之真人真事主角Eric Liddell，在1924年巴黎奧運奪得四百米金牌後，並無長居家鄉蘇格蘭，反而返回出生地中國天津當教師，一心一意幫助訓練當地兒童，誰知遇上日軍入侵中國，被關押在集中營，至1945年2月病逝。冼杞然話佢知道呢個故事之後，為之感動，於是用咗幾年時間在天津山東，蘇格蘭搜尋文字資料及搵老人家做口述歷史，決定將故事搬上銀幕，電影名為「終極勝利」The Last Race。咁樣重金拍攝經年，研究費亦唔少，是否中資投資？冼杞然話唔係，全部資金來自香港及海外投資者，包括理想集團等。
Liddell有個中文名叫做李愛銳，係傳教士之子，生於天津，後來亦成為傳教士，因體質關係，自小發揮驚人毅力，苦練跑步而成為短跑冠軍，其故事搬上銀幕，成為Chariots of Fire（烈火戰車）主角，得奧斯卡最佳電影而名傳世界。現在冼杞然所拍嘅新片係「烈火戰車」後傳，李愛銳由Joseph Fiennes飾演。導演話呢位演員之專業態度令人佩服到五體投地，佢自睇完劇本肯接套戲之後，自己就親自搜尋不少李愛銳之個人資料及生活習慣。拍戲時，有一幕係李愛銳與中國人對飲，安排佢飲蘇格蘭人至愛威士忌，但Fiennes唔肯拍，因據佢研究所得，李愛銳一生滴酒不沾，完全唔飲酒嘅。
但有劇情及商業需要噃，點擺平？Fiennes話酒就一定唔飲，事後佢可以免費拍一個廣告，補償贊助商損失，呢位先生有原則，有義氣，唔到你唔服。