LinkedIn認真有face，除咗獲得微軟千億入股，仲得到美國總統奧巴馬嘅垂青。奧巴馬周一喺年度「選擇美國投資峯會」講笑咁話，大約7個月之後，佢就會投入就業市場，仲要上LinkedIn搵工。
今次唔係奧巴馬第一次攞LinkedIn嚟開玩笑，今年2月，奧巴馬喺LinkedIn透露，佢第一份暑期工係喺夏威夷雪糕店賣雪糕。今年55歲嘅奧巴馬明年1月離開白宮，但佢仲未透露未來去向。
LinkedIn可以話係專業版嘅facebook，用戶可以喺LinkedIn尋找工作，而獵頭公司亦經常喺網站上招聘人手。至於LinkedIn近期威水嘢，就係佢剛獲得微軟以2,043億元現金收購，係微軟歷來最大單收購個案。