法國對瑞士場波冇波入，為免瞓着真係要搵啲嘢刺激吓。凡事睇wide啲，隨時見到36C，瑞士中場迪斯馬利嘅靚靚老婆艾祖娜（Erjona Sulejmani）有嚟捧老公場，佢件火紅外套都包唔住美好身材，露出誘人事業線益波迷。
艾祖娜嚟自阿爾巴尼亞，雖然我求大俠唔熟佢為人，但相信都係熱情奔放嗰類，睇佢fb唔少相都着得好性感，今次着低胸裝撐老公場都只係常規裝備嚟。艾祖娜同迪斯馬利好恩愛，佢哋囝囝Luan仲鬼咁得意，呢次都有嚟一齊睇波，不過就俾阿媽搶晒鏡咯。法國嗰邊好彩都有沙格拿老婆Ludivine捧場，唔使輸晒風頭。
今屆歐國盃睇唔少球迷搞事新聞，其實又唔係全部球迷都咁暴力。上周六愛爾蘭慘吞比利時三蛋之後，班愛爾蘭球迷冇發爛渣，反而喺場外圍住位法國靚女唱《Can't take my eyes off you》，其中一位男fans仲成功獲取一吻㖭。