財爺曾俊華同民主派嘅關係，確實非比尋常，睇佢份財政預算案高票獲通過就知啦，其中尤以同民主黨最親密，可能因此惹嚟美麗的遐想。話說西環傘兵劉偉德喺facebook話喎，前日喺中環香港會見到民主黨幾位元老級黨員、同時撞到鬍鬚曾，唔知係咪「秘密會議」？同時不點名指有啲人捧鬍鬚曾做特首，可能係為咗一官半職。
高達：咁啱都喺香港會啫
嘩，意有所指好大件事咁噃，八方當然都去查問白鴿黨嘅元老級人馬，睇下佢哋同鬍鬚曾搞啲乜勾當。李永達向八方證實噚晚係喺香港會出現過；咁佢同財爺要咗乜官職呢？「馬丁李約咗何俊仁同我，去睇盧冠廷演唱會咋喎，之前喺香港會食晚飯，都唔包括鬍鬚曾，應該係佢咁啱都喺香港會箒。」
高達笑笑口話，雖然大家喺同一個地方，卻無緣相會，噚晚都冇見過鬍鬚曾，可能有人先後見到佢哋與及鬍鬚曾，就自行有所聯想。都係嗰句啦，佢哋只不過約埋去捧盧冠廷場，就算唔可以像那天鳥飛往天上翱翔，都可以聽聽「陪着你走，一生一世也不分」輕鬆吓。據了解，財爺當時喺香港會同家人食飯，總之大家冇謂諗得太多喎！
李八方
mailto:[email protected]