【ViuTV風雲】備受注目的ViuTV選美節目《美選D.n.A.》，宗旨是美無分背景、無分過去，魔鬼與天使一樣可以參加，但想不到會吸引一班「珍品」現身。曾經上過A1頭條、因為㩒「老闆」碌20萬卡買Chanel禮物，然後再拿走其他人iPhone的車模袁晴晴（CoCo），前日突然現身柴灣面試，她的參選宣言是「重新出發」。
雙眼變大疑整容
不過CoCo去年被法庭裁定盜竊罪成，未知有案底是否可以參加？CoCo昨日在電話中說：「我有同大會申報，佢哋都認得我，件事過咗一年，律師話初犯一年後會自動銷案，所以我都符合資格。」見CoCo雙眼越來越大，問有否整容？她說：「大咗？唔覺喎，呢排有努力喼弗，希望個樣上鏡冇咁水腫，close up其實應該冇乜分別。」
節目邀請了方力申、Eric Kwok和火火陪伴佳麗比賽，問CoCo最想接觸哪位？她直說：「我諗小方，戥佢唔開心，知佢最近分咗手，佢𠵱家都係single and available，有幻想空間，咁相處接觸可以好啲，另外兩位有家室就唔好搞喇。」而2012年曾與陳肇麒（陳七）在時鐘酒店出入的𡃁模張可義（Emily）亦有參與。
Vanessa似應徵主持
節目監製曾昭隆表示有案底一定不可以參加，他說：「CoCo最初冇喺表格上填有案底，但我哋問佢都有誠實答，佢話已經銷案，我哋又唔係法官，到佢真係入到第二round就一定會check清楚。」有傳聞指ViuTV貼錢予42歲人妻Vanessa面試造勢？監製否認：「一間公司要使錢都唔會使喺唔應該使嘅地方，呢位Vanessa當時好似嚟見工想做主持多過去選美，我哋都愕然。」
採訪：嵐山