關公好忙，雖然冇Lancome咁大鑊，但稻香首廣告歌都喺網上有爭議，雖然有人讚易上口，但亦有人鬧係勁膠洗腦歌。唔知邊首？咪「火鍋配肥牛」囉，去片 https://www.youtube.com/watch?v=xkY8xEmAErI
網友串爆首歌係「世界級」老土，旋律節奏old school，歌詞仲．．．（「點心，叉燒包，Yummy Yummy Yeah」呢句歌詞發夢都記得。）
咁不如有請稻香關公親自解畫啦。稻香話，廣告歌係配合集團25週年，由集團市場部同製作公司用咗一年策劃（！！！） 邊飲邊食（！！！）創作嘅。
稻香仲話，「今次廣告想畀人WOW嘅感覺」（！！！！！)，拉近中式酒樓同年青人、小朋友距離，所以一早策劃要節奏強、易上口，仲參考80年代曲風。（不過，費清喺80年代係聽梅艷芳、張國榮喎，好似冇乜聽過呢類曲風。)
點解廣告角色打扮咁騎尼，一時喺原始世界，一時又喺未來世界？稻香話靈感係，食品會隨時代改變，所以廣告係講時空穿梭意念。（原來係穿越！）
不過，部分網友鬧爆之餘，不妨留意吓，稻香話首歌有啲gimmick位㗎，包括首歌開頭加入「登登登櫈」音樂聲，係以前酒樓職工頭圍用膳嘅聲音，想勾起大家對酒樓集體回憶。另外，片段見到嘅巨形點心，例如足球咁大嘅叉燒包、拳頭大嘅燒賣蝦餃，都係製造實物拍攝，仲用咗超過100個(！）叉燒包㖭。
費清唔知大家聽完會唔會改觀，淨係知道呢篇文總共用咗13個感嘆號，可想而知費清真係有啲嚇親。最後想問，究意咩係WOW嘅感覺？
費清＃要生計，也要生活＃毋忘初衷