港人近年鍾意食好西，唔少年輕人更將興趣變成職業，向廚神之路進發。人稱「少林寺廚房」嘅中華廚藝學院最近主辦全港青年廚師中餐烹飪比賽，為青年廚師提供切磋平台，青少年組畀16至23歲人士參加，最終11位廚神躋身決賽，包括正修讀中華廚藝文憑嘅90後女將。
女士體力稍遜於男士，做廚師會辛苦啲。女廚神羅子逸接受政府新聞網訪問時話，廚房環境又濕又滑，悶熱又危險，作為女性真係要有堅定嘅決心同熱誠，先可以喺廚房站穩腳，但佢冇因此洩氣，轉喺技術方面下苦功。今次佢設計咗「海之果園」主題菜參賽，以紫色為主調，將蝦肉混和酒香同鮮果醬汁烹調，結果獲得優異獎兼專業表現獎。羅子逸話今次參賽有少少緊張，但獲益唔少，學習到控制個人情緒，希望學成後做到職業廚師。