【本報訊】天時暑熱，出一身汗後無抹乾或清潔身體，或在公眾場所赤腳行路或共用毛巾，隨時會惹到一身癬。皮膚科醫生指出，今年春夏特別濕熱，助長真菌滋生及感染，皮膚生癬的求診個案更上升。日常要抗癬最重要是保持皮膚清潔和乾爽，在公眾地方沖涼最好穿着拖鞋，亦切忌赤腳行，打波、做gym或瑜伽出汗後，應盡快沖涼或徹底抹汗及換衫，以免真菌有機可乘。
記者：梁麗兒
皮膚科專科醫生何家強表示，春夏的濕熱天氣有利真菌傳播，若個人衞生差，容易出現真菌感染。近期每周接獲15至20宗皮膚生癬的新症，以腳癬（即香港腳）、股癬較多，其次為汗癬。
皮屑及汗水助長真菌滋生，何指，最常見是在公共地方感染香港腳，例如赤腳在泳池行路，「隻腳帶咗真菌之後，又着啲唔透氣嘅鞋，長期焗住出汗，香港腳就發作」。以往香港腳多困擾男性，但近年求診個案不乏女性或年輕人，例如在健身室做瑜伽期間，曾赤腳踩地板而中招，或少年玩跆拳道後中招。
熱水洗襪殺菌
香港腳多先在第4至第5隻腳趾之間的皮膚發作，症狀包括痕癢、濕、出水泡、脫皮、出紅點或疼痛。何指，一般可使用外用抗癬膏對付真菌，同時要做好日常清潔，包括用熱水清洗襪子後多曬太陽，幫助殺菌。日常可用消毒藥水抹鞋櫃，並曬鞋殺菌。穿着涼鞋、質地較薄的波鞋有助透氣，運動後要清潔洗淨腳部包括腳趾，然後抹乾，避免腳趾潮濕。
勤抹汗沖涼預防
股癬多見於股溝、大腿內側等容易出汗、焗住的「陰濕」位置，何稱，患者多為常做運動或汗多的男士，例如打波出汗後無仔細抹身，在更衣室感染，「尤其好多人去，好似更衣室呢類，又潮濕又冇太陽曬到嘅地方，比較容易傳播股癬」。股癬比足癬更痕癢，患者容易抓損皮膚，或「痕到瞓唔到」，部份患者會由股溝生癬至下背，或由大腿內側至股溝。男士減少穿緊身內褲如三角褲，可減少因皮膚磨擦引致的感染風險，建議穿boxer內褲。
大汗或運動後無換衫、無沖涼的人最容易感染汗癬，何指，汗癬特徵為皮膚會出現約一厘米大的紅圈或紅疹，通常在背部或胸口前。由於無其他包括痕癢等症狀，較少人求診，加上很少傳染給別人，患者可擴散至整個上半身，影響外觀才求診。出汗後沖涼，或勤抹汗、換衫，保持皮膚通爽，有助預防汗癬。
想輕輕鬆鬆健康?，記住留意健康蘋台
http://health.appledaily.com.hk/