噚日信置（083）新界北區有個新盤賣樓，咁佢哋一如既往就安排集團主席黃志祥大公子黃永光（Daryl）同埋營業部聯席董事田兆源（Victor）出嚟同傳媒講兩句、影張相。
點知原來噚日係Daryl嘅38歲正日生日，大班記者落到去售樓處已經見到Victor拎住個蛋糕同Daryl慶祝，之後現場嘅信置同事同一大班地產代理仲同佢唱生日歌，賀一賀佢。
Daryl話自己已經唔係第一次正日生日開工，而佢今年嘅生日願望喺「身體健康、仔女身體健康、老婆身體健康、香港繁榮安定」，做完公司嘢之後打算同囝囝囡囡好好咁食個午餐，之後全日嘅時間都打算留畀屋企人。