蔡約翰贏第四場「慣勝聆聽」、第七場「勁開心」起孖，跟手蘇偉賢有樣學樣，呢位新晉練馬師先於第五場由郭能贏4.8倍大熱門「真好漢」捧盃，繼而第八場佢以40倍大冷「喜得福」在黎海榮胯下報捷，賢廐兩駒均打開在港勝門，兼且連續兩次賽事有馬贏。
「喜得福」爭第八場四班1400米，這匹四歲澳洲自購馬，之前在港九戰零獎金，表現乏善足陳，但這天續配黎海榮，由谷草1200米加程首戰沙田1400米，末段零零仃仃一隻馬從大外欄殺上，雖則越衝越斜，向觀眾席這邊衝刺，但卻維持勁度，超越所有對手彈甩逾兩個身位勝出，單Win派405.5元，成為這天暫時最冷頭馬，組合獨贏A3派24元正，黎海榮亦告取得守齋一個月以來首捷。
「喜得福」同時係黎海榮季內首度勝出賢廐馬，呢場二至四名順序由半冷門「確威龍」、大熱門「好叻仔」及另一半冷「永高」拎到，四重彩派43萬幾。
蘇偉賢說：「『喜得福』之前跑谷草1200米嫌短，今仗1400米更合發揮，當初我訓練此馬時，以為牠是短途材，看過馬兒陣上走勢，越來越覺得牠不是短途馬。我當年去加拿大學習馬房工作之前，曾在美聯地產做過幾個月經紀，當時與易國良是同事，相隔多年後我們重遇，易生已升呢做『喜得福』馬主，世事如此奇妙。」而易國良太太易劉瑛琳，現時是中原地產高層。