歐國盃進行得如火如荼，球迷們未來一個月又要過捱着夜睇球賽、翌日返工黑眼圈的日子了。身為球迷，要支持自己追捧的球隊，點唔會買番件波衫支持一下？香港其實有不少男士對儲波衫情有獨鍾。
現職廚師的陳嘉健，人稱Dee哥，除了有一手好廚藝，他亦是facebook「足球球衣珍藏愛好者」群組的「大廚」，連同他在內，由五位球迷義務掌管群組內成員交流的大小事務。由2014年3月創群開始，不夠四個月就已經有超過3,000名球迷加入，去到現時更接近有9,000人，數字上可以說是facebook內最多球迷的波衫分享組群。開了群組，希望可凝聚香港波衫愛好者之餘，又舉辦睇波活動、踢波聚會等，亦想球迷正視購買正版波衫。
20年入手500件
自開設這個群組，阿Dee才發現香港原來有這麼多儲波衫的卧虎藏龍：例如有人由日本職業聯賽創立25年以來，每支日職球隊的波衫都一件不漏；有人在2014年世界盃，買足32強的波衫一件不漏；有皇家馬德里球迷甚至為了支持愛隊，今季主場波衫買足20件同款，分別印上正選和後備的球員名……認真瘋狂，所以連阿Dee都話，「全球就唔敢講，但如果係亞洲來計，香港球迷的儲波衫能力同水平都算係數一數二！」
到底波衫有甚麼吸引力，可以令到一大班男人為之着迷，甘願一次又一次「課金」？1996年開始儲波衫的阿Dee，今年已經是他第20個年頭買波衫，加加埋埋有400、500件走唔甩，主力儲龍門波衫的他，單是2014/15球季adidas的龍門衫，同一pattern就足足買了19件！四、五年前高𥧌期時，單單一個月買了20、30件波衫已經見怪不怪；今年歐國盃開波無耐，他就已經鎖定要買德國、法國、意大利及英格蘭的波衫，合共至少12至15件。
「男人總有一樣嘢敗家」
阿Dee都承認，買的一刻「睇啱就買」，不會考量太多，「之後返屋企俾人鬧係另一回事，老婆當然覺得我咁儲好瘋狂，起初梗有埋怨，但逐漸會唔理……講多兩句就開始隨便我，最後兩夫婦約法三章，一個月頂多只可以買幾件。」不過阿Dee都承認，常常忍不住又過了「底線」，惟有如此總結：「男人總有一樣嘢敗家，視乎程度去到邊。」
在身邊人眼中，波衫的功能只是着上身，阿Dee就視儲波衫為給自己的一種滿足感，「我哋呢班球迷儲波衫已經去到不能自拔的地步，不過每次post分享新波衫時，其實樂在其中……可能人哋會覺得我們很瘋狂 ，但為何我們依然會繼續儲，就是那種凝聚力 ，當你整班人都是瘋狂時，你就不會覺得有問題。」
記者：余瑋
攝影：劉永發
部份圖片由受訪者提供
想輕輕鬆鬆健康?，記住留意健康蘋台
http://health.appledaily.com.hk/