牙買加飛人保特上周六參加喺金斯敦舉行嘅格蘭披治田徑賽男子100米跑，以備戰八月展開嘅里約熱內盧奧運。雖然佢一起步就爭啲仆喺度，不過最終以9秒88贏咗冠軍，仲造出今年第二快時間。喺里奧力爭男子100米同200米跑三連霸嘅佢話：「我跑得唔係幾好，但有能力攞冠軍。」另外，由於同保特一齊幫牙買加贏北京奧運男子4x100米跑接力冠軍嘅尼斯達卡達藥檢「肥佬」，所以牙買加有可能被褫奪金牌；保特話若然係真嘅話，唔介意交番個牌出嚟喎。