立法會選舉下月中開始提名期，關於選舉嘅傳言滿天飛，而最新一則係有意出戰「超級區議會」嘅新民主同盟「走票」，有指該黨兩名區議員唔會提名代表新同盟出戰嘅關永業，分分鐘唔夠提名入唔到閘。
新同盟連同有意參選超區嘅關永業，原本有15個區議員，早前獲民主黨前成員、西貢區議員林少忠加盟，令新同盟唔需要借票亦可出選超區。如果好似傳言所講，就要外借兩票先夠提名，有指其中一個「走票」嘅係該黨沙田區議員丘文俊。
八方問過丘文俊，丘斷言否認，仲話今日先同關永業一齊落區，對傳言莫名其妙。當事人關永業就話黨內冇區議員話唔提名佢，亦冇人要退黨，質疑選舉臨近，有人唔想佢參選而亂放風。