皇家馬德里今屆捧走歐聯，雖然陣中一眾國腳唞咗兩星期多啲，就要參戰歐國盃，不過狀態就似乎冇咩跌watt，好似加里夫巴利上周六就射入靚罰球，幫威爾斯贏斯洛伐克。周日歐國盃D組，皇馬中場莫迪歷亦有金球，克羅地亞就靠佢一箭定江山贏土耳其1:0。
呢場喺巴黎王子球場嘅比賽吸引唔少靚女球迷（下圖），克軍對住土耳其可以話控制戰局，雖然早段有祖記前鋒文迪蘇傑連番失機，不過41分鐘土軍後衞解圍不遠，伏兵禁區頂嘅莫迪歷窩利抽射，土軍門將巴巴簡束手就擒。克軍下半場有達里祖史拉同比列錫先後射中楣；土耳其亦都連續四屆歐國盃首戰輸波，認真慘情。
土耳其輸波輸品，球隊好似汽車維修員咁茅，鬥頂時仲頻頻開肘，好似前鋒辛克杜辛就一㬹打落克軍中堅哥魯卡度，哥魯卡當堂爆晒缸，要包實個頭先可以繼續比賽。