這天沙田日馬第五場係錦標賽十八區盃，由四班馬跑1400米，拉士鬥得好激，結果由郭能操刀、蘇偉賢訓練之「真好漢」贏馬攞威。
今場係三T大彩池頭關賽事，郭能騎住大熱門「真好漢」，同沿途貼欄前領的黃皓楠座騎「瀟灑王子」鬥足半條直路，一度追極都追唔過後駒，卒之最後幾步於郭能用左手鞭下，「真好漢」成功後來居上捧盃開齋，單Win及組合獨贏A1，分別派48.5及25.5元。郭能及蘇偉賢組合第四場「夢幻仙子」搏失屈居亞軍，今場兩人即憑「真好漢」補中，後駒連續三仗配柏寶、杜利萊、羅理雅三大師傅只得二三名後，終於郭能初騎即替牠首次在港贏馬，難怪賽後蘇偉賢豎起大拇指，對其發揮大為讚賞。
「瀟灑王子」易配黃皓楠減七磅都係贏唔番，影相輸短馬頭位做阿二。而上屆十八區盃柏寶騎「幸運如意」跑第二，頭馬則是由蔡約翰訓練的「首飾太陽」，水準超高。今屆柏寶、蔡約翰呢兩位鄉里合作，結果今場「翔惑」拼盡都係第三，第四名係落飛馬「怪獸家長」，四重彩派四萬一千幾。