英格蘭領隊鶴臣，俾香港網民恥笑為「學神」、「P牌」（新牌仔）真係有道理，上周六歐國盃B組首戰，人強馬壯對住俄羅斯，大好形勢領先一比○下，補時階段畀俄軍逼和一比一，延續英軍48年歐國盃首戰不勝魔咒，痛失兩分，身為歐國盃最高人工教頭，鶴臣真係知唔知醜㗎？
卡尼六次角球冇料到
英格蘭傳統上打4-4-2，鶴臣跟隨世界潮流打4-3-2-1，基本上問題不大，但正前鋒只用一人，哈利卡尼同占美華迪兩位英超首、次名神射手，就只好犧牲華迪做後備，隊長朗尼亦都要退居中場，同熱刺孖寶迪利阿里及艾歷迪亞助攻助守，但左右翼鋒用上史達寧同拉爾拉拿，就問題大嘞。史達寧今季長期踢左翼，攻力已經大減，今仗對住俄羅斯右路防守，威脅亦都唔大，右翼用上利物浦中場拉爾拉拿，係就係走上走落夠晒勤力，但把握力認真麻麻，上半場連番失機，唔識留放搞到下半場莫晒氣，不過鶴臣仲俾佢踢足全場，華迪、史杜列治、拉舒福特等全場冷板，真係吹脹。
曼聯前領隊雲高爾，都算一代戰術大師，佢試過安排中堅戴利白蘭特、菲爾鍾斯開角球，真係藝高人膽大，鶴臣搵人開角球都獨樹一幟，唔搵迪利阿里、拉爾拉拿開，竟然搵前鋒卡尼去開，結果全場六次角球由佢開都冇威脅，我求大俠真係琜晒頭。連前英格蘭9號仔舒利亞都喺Twitter話：「如果領隊叫我開角球，我嘅答案係『叫第二個開啦』。」
補時被俄軍逼和一比一
嗱，我求大俠都好公道，鶴臣都唔係冇好戰術，好似安排熱刺冇份射罰球嘅艾歷迪亞，處理國家隊自由球，結果就靠佢73分鐘射入罰球，幫英軍先開紀錄。拎住500萬歐元（約4,300萬港元）年薪嘅鶴臣，係今屆歐國盃人工最高教頭，但臨場調動就渣過小學雞，除咗唔收起拉爾拉拿外，領先時收起防守力唔錯嘅隊長朗尼，換入「太子」韋舒亞，亦都俾人插到爆，英軍越踢越沉，結果補時階段就俾俄羅斯後衞華斯利比里蘇斯基頂入，追成一比一平手；俄羅斯教練史路斯基，正職係莫斯科中央陸軍教練，國家隊係冇基本人工，即係義工教練逼和最高薪領隊啦。
咁其實首戰和波，英格蘭都係踼番近年水準箒，自1968年之後，英格蘭歐國盃決賽周首戰都未贏過，累積五和四負，鶴臣賽後就失望咁講：「完場前被逼和，同輸波一樣難受，其實己隊全場控制戰局，球員亦發揮全力。」英格蘭下場就要對住「細佬」威爾斯，唔知可唔可以反底嘞。