人的關係好脆弱。特別是在這個用手機談情靠網上聯繫的時代，明明上一分鐘還在討論下次食乜好，下一秒對方可以突然消失，不再回覆你。然後這個人，從此就在你生活中消失得無影無蹤，好似從來都冇出現過咁，外國叫這個行為做ghosting－即係好似鬼一樣消失咗。其實最慘都唔係少咗個「朋友」，而係令你自信心受打擊，不斷諗究竟自己做錯啲乜。如果真係不幸被ghosted，不妨參考美國著名心理學家Dr. Antonio Borrello分享的六步曲，教你如何應付「撞鬼」。
第一步：認清事實。
對方沒有回覆你，可能因為太忙忘記了（不過忙到咁耐都醒唔起你呢個人，其實你都知道自己在對方心中的位置），你可以再傳一個短訊，提醒他你正在等候他，如果依然收不到他的回覆，咁你知咩事啦。
第二步：接受事實。
不要再抱無謂的希望，越快接受你已被ghosted的事實，你才能快點復原，向前行。
第三步：忌做吊靴鬼。
千萬別跟蹤對方、刻意要碰到對方，或者不斷留意他的facebook等社交媒體的動向，這樣會令你更難放低往事。
第四步：從中吸取經驗。
不妨嘗試回想相處點滴，如果發現自己真的有不足之處，不妨從中吸取經驗，做個更好的自己。
第五步：明白其實未必關你事。
網上交友的風氣盛行，現代人識朋友太容易，所以對方消失未必因為你唔夠好，只是選擇太多，令到人的關係變得廉價，自然不珍惜。
第六步：專注改善自己。
不少人在「撞鬼」後，都會急於找下一個人來填補失落，但其實此時你更應該專注去改善自己，不要再重新捲入這個沒完沒了的循環中。
記者：陳倢