天氣熱！又到玩水季節，想不到深水埗腦場都會有游水產品銷售，所講是HP AC300W。
我明白，現時市面Action Cam以GoPro及山狗為王道，不過如果你沒有攝影系統的負累，只想簡單方便享受夏水禮，這部HP AC300W可以一諗；首先是價位問題，官方標價是$2,980，一般攝影用品店最平只做到$1,800-$1,900，不過腦場這邊，竟然首度下試$1,280。
此Action Cam抵玩之處，是使用套餐式設計，除了最基本的1,600萬像素CMOS、143°超廣角運動型相機外（1080p@60fps），跟機仲有一隻可實時傳送拍攝畫面的手錶，而且兩者都有60米防水設計，愛玩水者真係幾啱玩。
不過講到尾，都要考慮畫質問題，在網上立即翻查一段GoPro HERO 3與HP AC300W的畫質比對片，兩機算係同期產品，畫質亦相當貼近，不過光暗位的迅速變換，HP感覺會有半秒的遲緩，但效果就自然一些，有辣有唔辣！
另外跟機配件亦頗多，由防水機殼、頭盔架、單車架、連接支架樣樣齊，買佢只有一個原因，平價落水小玩意。
查詢：展昇 深水埗黃金商場地面42至44號舖
記者、攝影：朱崇德