【文化籽：西遊記】
經典美劇《逃》（Prison Break）死唔斷氣，宣佈會在今年內推出九集《Prison Break：Sequel》。最新預告片一出街，大家的青春呀回憶呀又好像湧出來了。事實上，距離第四季的所謂大結局，得七年。2001年出道的Twins不停販賣集體回憶。美劇界的情況，跟香港樂壇，很相似。
上個月，《悠長假期》二十周年，瘋狂洗版。如果說《悠長假期》象徵日劇界高峯，最能夠代表美劇頂尖的，可能是《逃》。它一定不是神劇，第一季緊張刺激娛樂性豐富，但第二第三第四季都明顯出現拖橋及重複的慘況。何況，即使單計第一季，也略嫌不夠深度，去不到雅俗共賞的高度。
不過，它最入屋。時為2005年，時裝動作美劇王牌《24》正播到火紅火熱，開了個好局。狗仔隊偷拍到王菲買碟煲，為《逃》創作出最有效果的廣告攻勢。無綫大鑼大鼓找來黃德斌谷肌扮監犯為《逃》拍攝宣傳片，幾有心思幾有誠意。今日，連為美劇配音都不願，所有心思所有誠意，都放在大陸的《琅琊榜》。
係無入錯貨。你很難找到有個人話第一季的《逃》不好看。衝動大佬借錢供智慧型細佬讀大學，點知被屈殺人，被判死刑，知恩圖報的細佬居然將監獄地圖紋滿全身就一條友入冊，打算帶埋大佬逃獄。每一集都有難關要過，就睇細佬如何運用驚人的智力和運動細胞來化險為夷，節奏勁快，難得在過關過程合情合理。男觀眾可視之為一局局RPG game，女觀眾單看兩兄弟的赤裸上身已經尖叫，還未計一眾配角個個各懷鬼胎似《金枝慾孽》，連傳統港劇口味的觀眾都包羅埋。一舉將比較離身的《24》的龍頭地位取代，也很合理。
太深奧的，很難攻陷所有人；易入口似《逃》，追追趕趕，目標明確，才最討人歡心。無奈第一季已用盡子彈，即使第二季加入另一高智能警探追捕逃犯，試圖製造出雙雄互鬥局面，但失去困獸鬥元素，吸引力減一半。到第三季，將戰場搬去巴拿馬監獄，見步行步的迹象已經很明顯，硬插男主角上一代，再植入一間神通廣大在背後操縱一切的company，又逃不出美劇最常用的陰謀論框架。到第四季，連明明已死的女主角也要復活救亡，老實講，就此收手無再拍落去，功德無量。
何苦又要翻炒多次呢？強如《X檔案》（The X-Files），事隔十四年後，無厘頭在今年整六集出來，有頭無尾，完全唔知想點。近代少少的《Heroes》，爛尾收場，隔五年後，又忍唔住整套《Heroes Reborn》，簡直可以用慘不忍睹來形容。食老本，要食得好看，至少要先有個完善計劃。看《Prison Break：Sequel》的劇情簡介和先導預告片，就似乎很難令人產生甚麼期望。首先，安排早已入土為安的細佬Michael Scofield翻生，已經是老到不能再老的情節，跟佢老婆在第四季重現人間，可算一模一樣。就似無綫電視劇，兩兄弟永遠愛上同一個女人，兩姊妹又永遠愛上同一個男人，並且失過憶。唔係話無可能發生，但或然率高到接近百發百中，未免過份巧合及順手。其次，今季講Michael Scofield身陷也門監獄，要勞煩大佬Lincoln Burrows出手相救。咪玩啦，Lincoln Burrows係有型係大隻，但智商有限衝動成性，點樣劫獄呀？如何上網買張前往也門的機票，都分分鐘要搵個仔幫手啦。如果，我是Michael Scofield，應該會有以下想法：「本來諗住放假好舒服，點知突然間就有一個壞事大佬幫拖嘅問題。」其實自己一個更開心啦。
老本，唔係話唔畀食。可否大膽少少，有自信少少？可以考慮一下將配角升職做主角嘛。例如之前集集有份的T-Bag，由他負責幫Michael Scofield逃獄，至少比較有說服力。孭唔到飛？感情分搭救有餘。又或者，直頭唔使Michael Scofield翻生，反正演員Wentworth Miller埋了DC Comics的堆，正忙於拍攝電視劇《閃電俠》（The Flash）及《明日傳奇》（Legends of Tomorrow），就唔好騷擾人太多。你立即話，無Michael Scofield？仲係《逃》？無大隻仔欣賞，仲要睇？無所謂，我有個叫Michael Scofield起死回生得很合理的方法，就係立即跟《The Walking Dead》合作，講Michael Scofield在棺材中變成喪屍，重出人間後，被人類囚禁，死唔去的大佬收到風，立即前往營救。而安排一隻喪屍棄穿上衣露出胸肌，實屬情理之內，完全是雙贏局面。反正《The Walking Dead》已發展到第六季，開始步入樽頸，整番套《逃出陰屍路》，今年海洋公園的萬聖節鬼屋，就不必再倚賴龍婆羅蘭，可以改叫黃德斌重操故業扮Michael Scofield，只需化個喪屍妝。好離譜？係呀，係好離譜。離譜得過吳克儉的說話？離譜得過我們還要納稅來畀人工佢？
撰文：方俊傑
觀塘長大，壹仔打滾，偏愛西片、西劇、中日韓美女。利物浦悲慘球迷，非西人一個。facebook專頁：方俊傑
編輯：李寶筠
美術：楊永昌