今屆亞冠盃八強冇晒日聯球隊，其中浦和紅鑽喺周三晚同FC首爾（圖）激戰120分鐘後互射12碼飲恨。首回合紅鑽贏1:0，而喺今場，首爾就靠丹贊奴域入波，總比數扳平1:1，比賽進入加時首爾先入一球，但紅鑽嘅李忠成喺112同115分鐘建功，幫球隊喺總比數領先3:2。眼看就嚟完場，首爾嘅高堯韓喺121分鐘射入世界波，兩隊兩回合踢成3:3，要以12碼分勝負。12碼都要射到第八輪，首爾贏7:6，晉級八強。今屆亞冠盃八強冇晒日聯同澳職聯球隊，韓職聯同中超各兩支，阿聯酋有艾阿恩同阿爾納沙兩支代表，另外兩隊分別係卡塔爾嘅艾查殊同烏茲別克嘅塔斯干火車頭。