上季三冠王巴塞隆拿，今季稍為跌watt，只拎到西甲同西班牙盃雙料冠軍，但都值得同球迷慶祝，周日，巴塞就喺魯營球場搞祝捷會，不過「MSN」得尼馬一個蒲頭，其餘兩個呢？蘇亞雷斯喺西盃決賽整傷大腿肌肉，佢就會留喺巴塞做復健，六月頭先飛去美國同烏拉圭大軍集合，準備美洲盃。美斯就喺祝捷會前嘅內部晚宴期間唔舒服，提早離場。而隊長恩尼斯達發表宣言，話明下季會繼續奮鬥，贏得更多冠軍咁話。