你以為香港水底一定比不上外國，原來未必！「無可否認香港水質一般，因為適合潛水嘅夏季，啲水係由珠江口流過嚟，水質較差，到水質較好嘅11、12月又凍，少人落水。但以我嘅經驗，水質最好嘅時間多數喺中秋節前後，再去到水質本身幾好嘅果洲群島附近，就有機會睇到比外國仲靚嘅水底世界，但一年可能只得一次機會。」Victor亦說，雖然香港水質大部份時間都較混濁，未必適合拍攝大環境，但美態可從小處發掘，「香港都有好多又細又靚嘅水底生物，例如我哋成日影、五顏六色嘅海兔，都係好易搵到嘅生物。」正如近幾年為Victor奪得香港潛攝大賽的作品，大多是微距拍攝的。
Victor作為潛攝專家，對裝備當然有一定要求，有甚麼貼士送給有興趣的玩家？怎料他首句便說「量力而為」，「喺水底拍攝同喺陸地好唔同，喺水底最重要係要保持身體穩定，控制好中性浮力，要有一定經驗先可以兼顧拍攝。初學嘅拎住一部好似TG-Tracker咁嘅細機已經足夠，熟習之後就嘗試喺細機外面加支燈，影出更好嘅效果。之後可以轉用M4/3嘅中型機款，提升質素。最後就係試用兩支燈，甚至轉用單鏡大機。」
要注意的是，燈或大型相機有一定重量，容易影響下潛深度，所以要依靠浮臂輔助，惟浮力太細便失去效用、太大則會無法下潛，Victor建議：「浮臂浮力大概設定到相機喺水底有輕微下沉感覺就得，但呢啲好講經驗。」另外，他亦強調器材要認真保養，每次潛攝完應作完善的清潔和保存，每次下水前亦要細心檢查，「即使一條頭髮或者貓毛都會令機身入水，一入水相機就有機會報銷。」
Victor推介 台灣綠島
「很多人潛水都會去菲律賓、馬來西亞，甚至澳洲，但我近嚟就去咗一個近啲嘅地點，水底一樣靚到我嚇一跳。」讓Victor大讚的原來是台灣綠島，他說雖然要搭車又搭船，但勝在較近、機票又平，而且綠島面向太平洋，水清之餘，生物亦相當多樣化，絕對是潛水和潛攝的天堂。「綠島好細，幾乎成條海岸線都係潛點，沿岸雖然唔算深，但水底地形特別又多樣化，有唔少山谷同珊瑚，非常多海底生物棲息，絕對值得一去。」
記者：韓繼聰
攝影：林栢鈞、陳永威
編輯：陳國棟
美術：利英豪