《華爾街日報》話人民幣國際化早喺1月已叫停，其實即係大家一路講開嘅鎖國，唔係新聞。如果而家有人好似李小加咁講香港受惠人民幣走出去，你當佢發噏瘋罷啦，乜嘢留番過咗呢關先講。
資本賬鎖國，之前已經分析過，重溫一吓，第一，令內地資產價格保持高企，原因係人民幣唔走出去，益咗樓市；第二，走資冇得走，剩下來所謂國企、地方政府垃圾債又冇人會追債，即時封咗爆煲後門，暫時冇得爆；第三，貨幣市場更容易失控，控制貨幣供應要更小心控制，以防爆煲，所以難以進行寬鬆貨幣政策，影響經濟表現，刺激經濟冇晒板斧。
至於對香港嘅負面影響一樣咁壞，原因係香港近年一味背靠祖國，而家唔單止大陸人少落嚟香港消費，係連人民幣都冇得走出去，咁香港政府一向視自己為人民幣離岸金融中心，莫講話冇優勢，直頭係冇生意。金融又無、外來消費又無，剩番就要食香港過去13年老本，同埋靠自己人消費頂住囉。
呢十年八年香港唔止零售業一面倒斜中國，連港交所（388）三年計劃都只得中國，一味受惠人民幣走出去、走出去，北水南下乜乜乜，完全忽略香港過往國際金融中心優勢，結果中國資本賬唔通，香港自然要食惡果。所以，本地金融股不能買。
買股票絕不能一注獨贏，有乜意外隨時輸身家。一個政府治國、以至制定經濟政策，一注獨贏更加大錯特錯，有乜差池，害晒全部人民，要所有人民陪你埋單。你話中國經濟會衰？無論如何，香港都一定衰先，同埋會更加衰，呢個就係政府多年來一注獨贏強國嘅代價。
晉佳
http://www.facebook.com/advanceguy1