越來越多「醫生股」上市，講緊係不同嘅醫療集團，噚日就有隻喺香港專做牙科嘅醫匯集團（8161）以全配售形式，打算喺創業板招股上市。呢間公司屬於夫妻檔，59歲創辦人陳志偉與執董太太姜洁嘅年齡相差25年。
根據招股書，陳志偉與姜洁住喺大潭紅山半島松柏徑57號洋房。翻查紀錄，陳志偉跟另外三人以公司名義，早於2009年以3,600萬元買入此老牌豪宅，舊年再以另一間公司嘅名義，斥資8,350萬元買入此屋，而呢一間公司嘅董事就只有佢同太太姜洁，價錢喺舊年都屬於市價。
有趣嘅係，醫匯上市嘅集資淨額只係4,500萬元左右，即係集資所得資金，都唔夠陳老闆買間屋。不過一間公司上市嘅目的好多嘅，集資只係其中之一，醫匯就打算將大部份籌集資金買銅鑼灣物業作診所並擴充網絡。