因為中環核心內圍演唱會甩轆事件同咖啡廣告，黎明（圖）人氣爆燈，八方最近仲聽聞呢次中環核心內圍演唱會嘅外圍花邊新聞。
話說消防處一早向負責黎天王演唱會嘅製作公司講明，場地帳篷嘅安全標準要以英國為準，唔知點解，相關製作公司仍堅持用中國製帳篷，而有關帳篷亦通過唔到政府化驗所嘅測試，消防處當然唔批安全證書。
而黎天王竟然喺演唱會舉辦前兩日，親自打畀消防處相關負責人員查詢審批情況。八方聽聞，嗰位消防阿Sir接到黎天王電話時都有啲錯愕，但冇因為黎天王打嚟而畀面批安全證書，揸正嚟做同佢講消防處嘅相關安全標準，即係如果唔達標，唔會批證書，據聞黎天王都明白事理，冇施壓詐型。唔少消防阿Sir都讚黎天王處理演唱會甩轆事件有承擔，相對現屆特區政府，唔怪得有網民支持佢做特首。