自2013年開始躋身《福布斯》香港富豪榜嘅「舖王」大鴻輝興業主席梁紹鴻（Edwin），近年除咗由投資者變做發展商之外，原來仲有一個鴻圖大計，就係希望將大鴻輝上市。
Edwin噚日同華華講，上市呢個計劃開始咗兩個月，目前係會計師核數階段，上市時間十劃只有一撇，暫時想將收租投資物業同發展項目一齊上市。
Edwin係已故富商梁顯利孻仔，其實身家有幾多根本自己都未計得咁清楚。
而福布斯統計富豪榜排名，梁紹鴻由最初第25位，升到現時的17位，身家估計有304億元，照計都冇集資嘅需要，咁點解仲要上市呢？
Edwin就話，大鴻輝創辦咗40年，一直都係佢親自打理，絕不假手於人，「自己仔女又未必鍾意做」！上市都係希望間公司有規範監管，可以請到專業人士打理，令公司一直做落去。佢話睇目前地產市道，嚟緊兩年都唔會係上市好時機，不過最緊要係自己退休前上到。
現時64歲嘅Edwin咁快有退休大計？佢話言之尚早，一定唔會係呢幾年退落嚟，但好明顯上市係為間公司未來着想。