天朗氣清，最適合一家大細齊出動。約千名不同社區嘅家庭成員，噚日中午到咗九龍公園戶外廣場參加同樂日，仲以2,700個橙色同紫色嘅水樽啞鈴砌咗面積達10米乘10米嘅屋仔圖案（圖），原來佢哋想以呢幅巨型水樽啞鈴砌圖，為香港創健力士紀錄。查實呢個係香港賽馬會慈善信託基金聯同香港大學李嘉誠醫學院公共衞生學院合作推行嘅「愛+人：賽馬會和諧社會計劃」活動之一，提倡噚日為家庭節，場內仲有攤位遊戲畀一家大細玩。