【科技籽：家電男】
一般人對小型雪櫃的冷凍能力沒甚麼信心，可能早年充斥大量銀行贈品，用後發現這類行USB電源的產品始終乏善可陳。最近，一批小型雪櫃由日本到港，用上全新製冷技術，直接從插座取電，表現直逼家用雪櫃！雖然流動性大減，但十分適合港式蝸居，或者不會煮食只求凍飲的用家，亦可改插12V車電，照樣去到邊嘆到邊。
未睇功能、先睇賣相！這批小型雪櫃，外形可謂多姿多彩，既有電影《鐵甲奇俠》及《星球大戰》等角色造型，甚至足球也可造成雪櫃，非常吸睛！看似的骰，但JC Shop負責人Alan說它們容量不俗，「大約4至5.5L，可以擺到6罐汽水。」
15L珍寶版 可容納15罐汽水
一般家用雪櫃採用雪種加壓縮機來製冷，它們則不同，改用電子半導體製冷技術，Alan解釋：「其實原理同時下美容用嘅冷凍棒差唔多，直接用電力嚟製冷，相對會靜好多。」這批小型雪櫃放棄傳統USB供電，改由插座取電，所以製冷效能大大加強，記者以熱能探測槍檢測製冷金屬板，低至-10.5℃，對4至5.5L的細小空間來說，一開機便已冷風陣陣，「基本上，製冷溫度冇規定要有幾低，主要視乎室溫，通常係室溫再減20℃左右，喺室外會差啲。」
嫌4至5.5L太細？其實還有一款容量達15L的珍寶版可供選擇，Alan說：「製冷原理同4至5.5L版本一樣，都係用電子半導體製冷技術，不過因為空間仲大，製冷板會更大之餘，仲加入埋風扇裝置，等冷風容易啲走勻成個雪櫃。」15L的空間，最多可容納15罐汽水，加上因為夠高，更可放入2L的樽裝飲品，方便遷就一大班朋友的口味。
1小時汽水降溫大測試
為了檢示小型雪櫃的實際效能，記者做了一個小測試：分別在冷氣房、4L小型雪櫃、15L小型雪櫃及家用雪櫃中擺放一罐汽水，看看一小時後各罐汽水的溫度。結果發現，4L小型雪櫃中的汽水約10.5℃，家用雪櫃中的汽水約11℃，兩者的製冷效能十分接近！Alan說：「跟22℃的冷氣房比，小型雪櫃喺一個鐘內，已經令罐汽水跌咗10℃左右，同以往嗰啲好唔同。其實15L版嘅製冷能力應該仲勁，可惜空間太大需要多啲時間，擺耐啲會仲凍。」
JC Shop 觀塘創紀之城5期apm商場L1-23號
記者：朱崇德
攝影：潘志恆
編輯：陳國棟
美術：吳子豪