新世界發展（017）接班人鄭志剛（Adrian）一向鍾情藝術，最近佢睇中今年至hit嘅虛擬實境（VR），同台灣HTC及十多位來自世界各地嘅藝術家合作，喺旗下尖沙咀K11商場搞咗個電子藝術展覽，除咗睇之餘，市民仲可以玩埋一份。
VR呢項新科技，唔只改變大家睇影片嘅體驗，更可以應用喺虛擬繪畫，K11今次就聯同HTC即將推嘅虛擬裝置，搞咗個VR art jamming，公眾可一試喺虛擬實境入面畫畫，據悉雙方今次合作都傾咗幾個月。
發佈會當日K11仲搵咗一名法籍藝術家示範點用部機，話晒係專家，佢畫嗰個熱帶雨林真係幾有睇頭㗎！至於一班試玩嘅傳媒呢……就可能未熟悉玩法，只見有人戴住眼罩、揸住兩個手制周圍fing，場面都幾搞笑。呢個VR體驗區會擺放至下月19日，有興趣的市民可以去免費試玩。